Nuujts

15 fibberwari 2016 - Dankjewel
Oppe eerste plaats: sorry det de letste waeke 't nuujts sjlech is biejgehawte. V'r hawwe 't te drök mit feeste... En dan noe os dankwäördje...

Wauw! Wat höbbe veer eine chille Vastelaovend gehad! Prins Raph, Prinses Naomi, Vors Lars en alle angere naeskes höbbe volop gesjpronge, gezonge en zeen draan gegaon wie Verkes Wullem. Eigelik is mit gein pen te besjrieve wie sjiek ’t woor… Dus v’r verwieze uch gaer nao de Facebookpagina van 't KA-Hoes:
 www.facebook.com/KAHuisPosterholtDao kint g’r oppe foto’s zeen wie jidderein sjteit te sjtraole en te genete.

Eine heleboel luuj en ongernummers höbbe os dit jaor weer geholpe mit vanalles en nog get: os wageboewteam onger leiding van Job – van Graate Keub – Derix en traktorriejers Paul Fiete en Herman - van Pieke - Schmitz, ome Ger Roubroeks veur ’t levere vanne sjieke Hanomag en Paul van Elmpt veur ’t levere van oos ker en de aggregaat, Dorry Mulders en Henk – vanne sjluffert - Smeets veur ’t sjtalle van pakke en wage, de pekskesmakers (laes mooders en femilie vanne leiding), Ger Wassen veur ’t make van de sjitterende film veur ‘t oetrope, alle vrijwilligers van ’t KA-Hoes die zorge det de bar bemand is mit die daag, de sjponsors veur de prieze vanne verkleid- en ballonnewedsjtried Brasserie Timber's (op 't Hitje), Friture Lispet en kefee Biej Liebes, de winnende einzelgängers vanne grote optoch die häör prieze aan os höbbe gesjonke, alle luuj die flesje höbbe gesjpaard veur os flesje-aksie, de Biemösje en de Dorsjvlaegels veur ’t mitfeeste en waem v’r noe nog vergaete zeen. Allemaol eine dieke DANKJEWEL! Auch nog hersjtikke bedank aan alle luuj die oze Vors Lars zien patsj duchtig höbbe gevuld tiedes de Boerebroelig. Mit nog ein deil gifte van ongernummers links en rechs höbbe v’r ein sjoon bedraag biejein. Super! Det kinne v’r heel good gebroeke veur onger angere nuuj bokse op ozze wage en nuuj pekskes veur de dansmarietjes.

Bezonjer greutsj zeen v’r op ’t feit det os leiders Bas, Marcel (allebei 2x11 jaor leider) en Hanneke (16 jaor leider) de Chrétiën Janssen Trofee höbbe moge kriege. Die drie sjtoppe nao dit sezoen as leiding vanne Feesnaeskes, mer veer Feesnaeskes hove kommende jaore neet allein op paad, want Judith Peters, Tessa Reinders, Celine Goossens en Iris Meijers gaon nag sjteeds mit os mit. V’r verheuge os noe al op volgend jaor! Mer eers nog lekker frietjes aete biej Eric en Kitty…

Geschreven door: Hanneke op 2016-02-15 om 15:33:01


16 jannewari 2016 - Wagboewers in aksie
Os wageboewteam haet hel gewerkt vandaag! Thanx manne! De naeskes kriege weer eine sjoone wagel.


Geschreven door: Hanneke op 2016-01-16 om 15:36:45


15 jannewari 2016 - Bezeuk resepsie Dorsjvlaegels
 As Feesnaeskes gaon v'r netuurlik auch op bezeuk biej os grote zusje, JCV De Dorsjvlaegels. Veer höbbe duchtig gesjpronge oppe resepsie van Prins Jordy. 't woor ein sjiek fees. Kiek veur meer foto's oppe Facebook-pagina van 't KA-Hoes: www.facebook.com/KAHuisPosterholt.


Geschreven door: Hanneke op 2016-01-16 om 15:32:43


13 jannewari 2016 - Prinsefoto make
Tuurlik motte ozze Prins Raph en Prinses Naomi auch offisjieel op ein foto. Aafgelaupe gonsdig zeen v'r daorom de sjtudio van Vormgeving in Beeld van Roel Gerardts ingedaoke... 't Resultaat zuut g'r oppe 'home-pagina'. Chille foto's heur! 


Geschreven door: Hanneke op 2016-01-16 om 15:00:25


10 jannewari 2016 - Dao zeen ze dan...
Op ein gezellig en drök Prinsebal in ’t KA-Hoes op 10 jannewari is tiedes ein sjpannende aaflevering van Miljoenejach de Vastelaoveskanjer gevalle. Dao waerde Prins Raph I (Hoven) en Prinses Naomi (Wolters) oetgerope door sjpelkandidaat en kersverse Vors Lars (Simons).

Waem is presies os Prinsepaar? Nou, kiek in 't menu mer ins biej de Proklamasie. Dao kint g'r al häör name laeze... ’t Waert dit sezoen ein groot fees mit dit sjieke Prinsepaar, Vors Lars, Adjudante Nanne en Fleur, Nar Vic, os dansmarietjes Zoë, Britt, Matty en Ivana en de ganse raod van ellef. V’r zeen os dees daag in ’t dörp en haope det g’r auch allemaol nao ozze Buujelemiddig komp op Vastelaoveszònjig.



Geschreven door: Hanneke op 2016-01-10 om 22:42:49


9 jannewari 2016 - Proklamasie make
Daags veur 't Prinsebal haet de leiding vanne Feesnaeskes mit de Prinselikke femieljes de Proklamasie gemak. Det woor dieke lol! In 't menu vingk g'r de Proklamasie!


Geschreven door: Hanneke op 2016-01-10 om 22:34:34


7 jannewari 2016 - Verrasse Prins Raph en Prinses Naomi
De leiding vanne Feesnaeskes verzint ilk jaor ein leuke menier om de nuuje Prins en Prinses te vertille dit zie dit jaor veurop moge gaon. Deze keer ging "Gaston" op donderdig 8 jannewari, vlak veur 't Prinsebal, op paad om 't Prinsepaar te zeuke.
't Filmpke eindigt mit 't sjot van 't aanbelle op ein adres. Toevallig biej de Prins én Prinses. De awwers van Prins Raph en Prinses Naomi hawwe det filmpke op DVD gekrege vanne leiding en det op donderdig 7 jannewari veur Raph en Naomi aangezet (naodet "Tessa van 't werk" haw gebeld). En wat dink se? As se op 't beeld zuus det waert aangebeld, ging in 't ech auch de bel... De leiding vanne Feesnaeskes aan de deur! Ooooooooooooooh!
Wie Raph en Naomi toen reageerde, zuut g'r truuk oppe filmpkes inne videotheek (efkes kieke in 't menu)


Geschreven door: Hanneke op 2016-01-10 om 22:27:05


Dansmarietjes Delaney, Emmy, Michelle en Nina in aksie!
De Feesnaeskes höbbe auch dit jaor weer 4 nuuje geweldiggooie en supersjattige dansmarietjes: Delaney, Emmy, Michelle en Nina. Netuurlik sjtudere zie in ein recordtempo eine nuuje dans in, dae veur 't eers te zeen zal zeen oppe Bontje Aovend vanne Biemösje. Noe zit g'r vas keinuujsjierig op welk leedje zie danse... Tja... Dan zalt g'r toch ech nag efkes motte wachte, want det is ein verrassing! Hiejonger foto's van 't eerste oefenuurke in 't KA-Hoes.


Geschreven door: Hanneke op 2015-01-17 om 22:45:43


Prinsefoto make
Prins Luc en Prinses Jetske mosjte netuurlik auch oppe foto. Veur 't eers ginge zie oppe foto biej de nuuje hoffotograaf vanne Feesnaeskes, Roel Gerardts van Vormgeving in Beeld. En sjieke Prinsefoto's det 't zeen gewaore... Kiek mer!


Geschreven door: Hanneke op 2015-01-17 om 22:34:11


Heel Postert Bakt...


Op 11 jannewari woor 't weer zowiet... 't Prinsebal vanne Feesnaeskes! Eindelik zou gans Postert te weite komme waem de nuuje Prins, Prinses, Vors, Adjudante, Nar, Dansmarietjes en Raodslede waere. Mer netuurlik mosj d'r eers aafsjied waere genomme vanne naeskes van 2014 mit Prins Luuk (Mingers) en Guusje (Bindels). Oooooooooooooooh... det woor efkes ein sjnif-moment. Gelökkig kosj jidderein daonao alweer gauw lache, omdet de leiding ein waal heel gek toneelsjtökske deej.

Alle feesgangers wore namelik biej ein live-oetzending van 'Heel Postert Bakt'. Presentatrices Celine en Iris wore op zeuk nao allerlei bekkers die kosjte helpe om 't nuuje Prinsepaar te bakke. Zie krege hulp van Rick BAKKER, BAKKER BART Meijers, Luuk MINGERs en nag ein deil man. Mer väöl soeps bakte die d'r neet van. D'r kwoom vanalles oet de aove, eine halve gare, ein miss baksel, eine aangebranje, ein aw garde, mer nieks gein Prinsepaar. Ongertösje sjting 't ganse KA-Hoes al vol rouk... 


Dao zakte de temperatuur vanne aove opins onger nul. Vors inne aove. Letterlik. Want dao kwoom, tatadaaaaaaaaaa, de nuuje Vors vanne Feesnaeskes teveursjien. Nemes minder as Sjoerd (Theelen). En wie dae ging bakke kwoom 't helemaol good. In eine keer lökte 't om alle nuuje Feesnaeskes oet de aove te tovere. Mit Prins Luc en Prinses Jetske veurop! 't Woor drek ein groot fees mit alle nuuje naeskes. Waem det zeen, vingk-se hiejnaeve in 't menu. Dao kin se auch de proklamasie van Luc en Jetske laeze. Väöl plezeer!



Geschreven door: Hanneke op 2015-01-17 om 22:27:37


Verrassing... doe waers Prins(es)


Ilk jaor is 't weer sjpannend... Waem waere de nuuje Prins en Prinses vanne Feesnaeskes? Alle jonges en maedjes die biej de Feesnaeskes zeen, weite det al in november. Mer of se Prins of Prinses bös, det vertilt de leiding pas ein paar daag veur 't oetrope. Waorom zo laat? Omdet 't angers netuurlik väöl te moeilik is om geheim te hawte, duh! Heel get jaore ging de leiding op vriedigaovend de nuuje Prins en Prinses heel sjtiekem thoes verrasse. Keileuk en keisjpannend. Mer in 2015 wol de leiding 't ins angers doon. 't Leek bao Bananasjplit!

Op zaoterdigmorge hawwe Luc (Veelen) en Jetske (Hassink) allebei ein blaedje vanne posbode inne brevebös. Zie wore neet thoes gewaes wie de posbode ein pakketje veur ze kwoom bringe en kosjte det zaoterdigmorge om 9.15 oere ophaole biej 't poskantoor. Wat Luc en Jetske neet wiste, is det de leiding zo'n breefke vanne posbode haw gekrege en det sjtiekem biej häör inne bös haw gesjtop...

Zaoterdigmorge 10 jannewari kwome Jetske en Luc nietsvermoedend 't poskantoor binne mit häör blaedje. Ein bietje gek vonge ze 't waal det de hele femilie (die zote in 't complot) mit wool. En wie ze 't breefke inleverde, wou de meneer van 't poskantoor det zie 't pekske eers deje aopemake. Wat drin zoot? De Prins(ess)e-medalie. Klik
HIEJ mer ins veur ein filmpke van det moment. Det woor effe sjrikke, en daonao... Wore Luc en Jetske heel bliej! En de leiding die haw grote lol, want die zote mit zien alle versjtopt achter 't gordienke en kosjte alles zeen. 


Geschreven door: Hanneke op 2015-01-17 om 22:04:33


NUUJ: ein KidsPyjamaSjoemParty
Jááááááh! 't Geit gebeure. Behalve ein PyjamaSjoemParty veur de grote jeugd (16 jannewari 2015 vanaaf 20.30 oer) kump d'r noe auch ein Kids-versie veur alle jonges en maedjes oet groep 5 t/m 8 vanne basissjool. De Kids PyjamaSjoemParty is auch op 16 jannewari, van 19.00 toet 20.30 oere. Hawt det dus al vriej!
De organisasie is in henj van 't KA-Huis' Partyteam, JCV De Dorsjvlaegels en KCV De Feesnaeskes! Leukleukleukleuk!
Geschreven door: Hanneke op 2014-12-21 om 22:25:48


Aafsjied en welkom
Jaomer genog haet Job Derix besjlaote te sjtoppe as leider vanne Feesnaeskes. Det nao heel get jaore feeste mit de leukste kinjervastelaovesvereiniging van gans Postert (hae is vreuger zelfs Prins gewaes). Gelökkig zeen v'r 'm neet helemaol kwiet, Job haet os belaof det d'r blief helpe mit 't boewe vanne wagel. En v'r zalle 'm zeker wete väöl taegekomme in 't dörp mit de Vastelaovend.

D'r is auch leuk nuujts: Job haet geliek ein opvolgster gekrege. Nemes minder as Iris Meijers (auch ein awt-Prinses) kump 't leidersteam versjterke. Iris kin heel good sjpringe en fuive, dus det kump helemaol good. En nag meer leuk nuujts: Celine - wat veurig jaor 'stagiaire' woor - vingt 't zo leuk biej de naeskes, det 't besjlaote haet te blieve. Gezellie! 


Geschreven door: Hanneke op 2014-11-15 om 23:06:00


Wat geer mot weite...
 Bao de 11e van de 11e dus tied veur Feesnaeskes-nuujts!

Wat geer alvas mot weite:
- 13 november van 19.33 toet 20.33 oere is de insjrieving veur de nuuj Feesnaeskes in 't KA-Hoes. Info-bukskes waere dees of begin volgende waek oetgedeild op sjool.
- 't thema van de Buujelemiddig op vastelaoveszönjig is circus. G'r kint dus al beginne mit bedinke wat g'r wilt waere: kloon, leeuwetemmer of koorddanseres, of get angers oet 't circus.
- 't oetrope van de nuuje Feesnaeskes is op zönjig 11 jannewarie. Hawt dae daag alvas vriej.

Meer nuujts volgt laterzzz!
Geschreven door: Hanneke op 2014-11-15 om 22:58:40


Nuuj Feesnaeskes 2014 oetgerope!!!
 Op zónjig 19 jannewari waerde in ein boemvol KA-hoes ’t nuuje Prinsepaar vanne Feesnaeskes oetgerope: Prins Luuk I (Mingers) en Prinses Guusje (Bindels)!

Prins Luuk is van Erik van Sjra van de Lange van de Borgh en van Truus van Harrie van Baeres en van Yvonne van Lei van Bair van Tom van ’t Keutelsjträötje en van Gertie van Peter van Roubroeks oppe Boumsjtraot.
Oos prinses is Guusje van Vincent van Frans de landjmaeter oet Valkeberg en Nettie van de boerderie oet Waterval en van Joyce van Graadje van de Borgh en Marie van Puil oet Azerao.

Dit geweldige sjtel regeert mit de sjpreuk:
Van de Boumsjtraot toet oppe Donck,
Hawte de Naeskes de Vastelaovend jonk!


Prins Luuk en Prinses Guusje waere ´t kómmende jaor ongersjteund door Vors Fenne (van der Velden), adjudante Danny (van Riet) en Zoë (Willems), Nar Raf (Veelen), ós Dansmarietsjes en netuurlik de Raod van Ellef. Veer gaon d’r same mit de Dorsjvlaegels en Biemösje eine hele sjone Vastelaovend van make!

Toet sjnel in oos KA-Hoes!
Geschreven door: Hanneke op 2014-01-19 om 20:20:44


Mer leefs 44 aanmeljinge veur Feesnaeskes 2014
't Woor weer ontzettend drök gonsdigaovend 20 november in 't KA-Hoes biej de insjrieving veur de Feesnaeskes. Mer leefs 44 kinger wolle dit jaor waal mittrèkke mit de leukste kingervastelaovesvereiniging van gans Postert, terwiel d'r mer veur 21 jonges en maedsjes pekskes zeen... Biej de aanmeljinge zote 10 Prinse en 19 Prinsesse. De kans det-se Prins of Prinses waers, is dus maar heeeeeeeeel klein. Auch Vors wolle väöl kinger waere, dao höbbe zich 9 kinger veur aangemeldj. 't Leefs leet de leiding vanne Feesnaeskes jidderein mitdoon, mer det geit helaas neet en dus höbbe v'r dit jaor weer motte laote.

Alle awwers vanne kinger höbbe donderdigaovend 21 november eine mail mit 't sjlechte nuujts (doe bös d'r neet biej) of 't gooie nuujts (doe bös ... gewaore) gekrege. Netuurlik haopt de leiding det alle kinger die neet zeen ingelaot, toch mit komme doon mit de Vastelaovend! Bös doe benuujd waem de nuuje Prins en Prinses, Vors, Adjudante, Nar, Dansmarietjes en Raodslede waere? Kom dan zönjig 19 jannewari verkleid nao 't KA-Hoes. Van 14.11 toet 17.11 oere is 't fees!
Geschreven door: Hanneke op 2013-12-29 om 14:29:16


Bedank veur ein geweldig sezoen
 ’t Zit d’r weer op: Vastelaovend 2013 is veurbiej. Mit Prins Jurre I en Prinses Danée veurop höbbe veer same mit alle anger Feesnaeskes, Dorsjvlaegels, Biemösje en de luuj van Postert eine supersjieke Vastelaovend moge viere. Dao hawwe v'r 't zo drök mit, det 't biejhawte van dees website d'r ein bietje biej is ingesjaote... Sorry daoveur. Gelökkig höb g'r waal al alle foto's kinne zeen oppe FaceBook-pagina.

Ein paar (of zègk mer gerös: eine hele haup) luuj die det veur oos meugelik gemak höbbe, wille veer neet ongenump laote:
* Geer höbt waarsjienlik waal mitgekrege det veer ein sjtasiegeldj-aksie höbbe gehawte om veur eine nuuje Prinsewage te sjpare. Veer wille alle luuj die häör laeg flesje en sjtasiegeldj aan oos gegaeve höbbe, bedanke, en ein deil luuj in ‘t bezonjer:
o De Biemösje, die ein groot gedeilte van de optoch-kollekte aan oos höbbe gegaeve;
o Piet Zeegers, dae det verzonne haet;
o Prins Peter en Prinses Anita vanne Biemösje die oos ’t sjtasiegeldj op häör kedootje van ’t ABC gesjonke höbbe;
o Jack Cartigny, dae d’r veur haet gezorg det ’t inlevere van de flesje (en kratte!) biej de PLUS meer dan gesjmeerd loop;
o Robert Jacobs, dae de eerste pries in de optoch haolde biej de einzelgängers en dae aan oos haet gegaeve;
o De eljers van oos Feesnaeskes, die mit rondj zeen gegange om flesje op te haole en in te wissele;

* Oos wageboewers Erik Mingers, Thei Vranken, Rick van der Velden en Gerlon Cuipers, oos chauffeurs Paul Fijten en Paul van Elmpt, en de femilie Timmermans, Ger Roubroeks en Henk Smeets veur de wage, de traktor en de plaats om te boewe en te sjtalle;

* Roland Vervoort veur ’t sjnel sjakele en de gów zörg nao ‘t ongelökske mit ooze vleger;

* Rik van Bree, Meneer Pesjtoer Honings, Joep Bustin, Klaus Schmits, Ton Theelen, Iet Willems, Sven Schmitz, Marco Smeets en Erik Ridderbeek die oos geholpe höbbe om van ’t Dansmarietjesliedje zo’n groot sukses te make;

* Hannie Drohm en Jet Schmitz, die oos pekskes en mötsjkes groter, kleiner of weer alik make en ze zuuver hawte;

* En jidderein dae v’r missjien nag zeen vergaete: allemaol heel erg bedank!

Zo zuus-se mer weer: Vastelaovend viere kin-se neet allein, det duis-se same! Veer gaon alvas ins naodinke en rondjkieke veur dae nuuje Prinsewage. De lat ligk hoog, mer mit zoväöl óngersjteuning mot det goodkómme. Laot uch volgend jaor mer door oos verrasse, en kiek ongertösje auch ins op www.facebook.nl/KAHuisPosterholt. Dao sjtaon al eine haup foto’s en filmkes van ’t aafgelaupe sezoen.

Geschreven door: Hanneke op 2013-03-11 om 23:41:10


Kiek auch ins op Feesboek... ;-)
Naeve dees site is het KA-Hoes noe auch te volge op Feesboek mit netuurlik heel väöl foto's van alle activiteite... Check gauw www.facebook.com/KAHuisPosterholt. V'r zouwe 't geweldig vinge as g'r os Facebook-pagina 'leuk' vingt.
Geschreven door: Hanneke op 2013-01-06 om 23:02:17


Nuuje Feesnaeskes oetgerope!
Op zónjig 6 jannewari waerde in ein boemvol KA-hoes ’t nuuje Prinsepaar vanne Feesnaeskes oetgerope: Prins Jurre I (Reumkens) en Prinses Danée (Kuijpers)! Prins Jurre is van Roel van Harrie vanne Sjoester en Rita van Lud vanne Sigaremaeker en van Manon van Kapper Korrel vanne Grote Sjtraot en van Annie vanne Köster oet Ech. Os Prinses Danée is van Dennis van Miep van Mieke van Wiel van Kläör en van Esther van Dick van Vors Graad vanne Haofgengers.

Det zie good kinne feesviere, bliek waal oet häöre sjpreuk:

MIT JURRE EN DANÉE,
VIERE VEER FEES VEUR TWEE!

Prins Jurre en Prinses Danée waere ´t kómmende jaor ongersjteund door Vors Jill (Willems), adjudante Job (Vossen) en Luc (Veelen), Nar Sjoerd (Theelen), ós Dansmarietsjes en netuurlik de Raod van Ellef. Veer gaon d’r same mit de Dorsjvlaegels en Biemösje eine hele sjone Vastelaovend van make! Toet sjnel in ’t KA-Hoes!

En kiek auch ins op oos sjieke website biej 'Euver ós'. Dao vingk geer de proklamasie van Prins Jurre en Prinses Danée!

PS: ’t thema van de BUUJELEMIDDIG op VASTELAOVESZÔNJIG is dit jaor REIS RONDJ DE WAERELD. Zorg alvas veur ein sjoon pekske, want d’r zeen weer leuke prieze te winne! Auch höbbe veer eine vette artiest wete te sjtrikke veur de Buujelemiddig: nemes minder Miesjke (van ‘Hiej geit ’t Draak d’r aaf…’). Sjiek woh?
Geschreven door: Hanneke op 2013-01-06 om 22:06:58


Mer leefs 43 aanmeljinge veur Feesnaeskes 2013
't Woor weer ontzettend drök gonsdigaovend 21 november in 't KA-Hoes biej de insjrieving veur de Feesnaeskes. Mer leefs 43 kinger wolle dit jaor waal mittrèkke mit de leukste kingervastelaovesvereiniging van gans Postert, terwiel d'r mer veur 21 jonges en maedsjes pekskes zeen... Biej de aanmeljinge zote 6 Prinse en 21 Prinsesse. De kans det-se Prins of Prinses waers, is dus maar heeeeeeeeel klein. Auch Vors wolle väöl kinger waere, dao höbbe zich 9 kinger veur aangemeldj. 't Leefs leet de leiding vanne Feesnaeskes jidderein mitdoon, mer det geit helaas neet en dus höbbe v'r dit jaor weer motte laote.

Alle kinger kriege donderdigaovend 22 november ein breefke in de bös mit 't sjlechte nuujts (doe bös d'r neet biej) of 't gooie nuujts (doe bös ... gewaore). Netuurlik haopt de leiding det alle kinger die neet zeen ingelaot, toch mit komme doon mit de vastelaovend! Bös doe benuujd waem de nuuje Prins en Prinses, Vors, Adjudante, Nar, Dansmarietjes en Raodslede waere? Kom dan zönjig 6 jannewari nao 't KA-Hoes. Van 14.11 toet 17.11 oere is 't fees!
Geschreven door: Hanneke op 2012-11-21 om 22:38:35


't Sezoen geit beginne... jiehaaa!
Leef Feesnaeskes en Feesnaze,

Get vreuger es wat g’r van oos gewind zit, ein sjtökske vanne Feesnaeskes. Det kump zo: kommend Vastelaovessezoen is keikort. Daorom hawte v’r de insjrieving veur de nuuje Naeskes dit jaor al in november. Om precies te zeen op gonsdig 21 november van 19.30 toet 20.30 oere in ’t KA-Hoes. Alle jonges en maedjes inne laeftied van groep 5 t/m 8 vanne basissjool moge zich insjrieve. D’r is plaats veur 21 Feesnaeskes. Gaeve zich meer kinger op, dan mot de leiding helaas laote. Meer informasie euver wie dit wèrk, sjteit in ’t beukske det ein van dees daag waert oetgedèld oppe sjool. Waem neet in Postert op sjool zit, kint zo’n beukske aafhaole biej Bas en Hanneke (Heinsbergerwaeg 50) of in ’t KA-Hoes.

Op zónjigmiddig 6 jannewari is ’t dan zowiet. Eers traeje Prins Bas I en Prinses Ody en alle anger Feesnaeskes van 2012 aaf, dan duit de leiding weer ein maf toneelsjtökske mit ein sjpannende ontknuiping. Juus! ’t Nuuje Prinsepaar waert dan oetgerope. ’t Prinsebal vanne Feesnaeskes is altied baeregezellig. Dus zorg det g’r 6 jannewari vriej hilt…

Toet sjlot nag efkes dit: op Vastelaoveszónjig 10 fibberwari hawte v’r same mit de Biemösje enne Dorsjvlaegels veur de derde keer eine gezellige Buujelemiddig. Jidder jaor höbbe v’r dao ein anger thema veur en ’t is sjoon as g’r euch in det thema verklèd. Waem alvas aane sjlaag wilt mit ein sjoon pekske make: ’t thema is ‘Reis rondj de werreld’. Ideetjes? Eskimo, Chinees, Afrikaan, safari-ganger, Pruusj, Hoelahoela-maedsje en gank zo mer doer. Succes!

Eine hint veur de nuuje prins höbbe v’r nag neet… Eers insjrieve, dûh… 21 november in ’t KA!
Geschreven door: Hanneke op 2012-10-28 om 00:23:56


KA-Hoes noe auch op feesboek!
Naeve dees site is het KA-Hoes noe auch te volge op Feesboek mit netuurlik heel väöl foto's van alle activiteite... Check gauw www.facebook.com/KAHuisPosterholt. V'r zouwe 't geweldig vinge as g'r os Facebook-pagina 'leuk' vingt.
Geschreven door: Hanneke op 2012-08-28 om 22:22:10


Nag eine keer draan tiedes Boerebroelof
De deesdig kwoom ein sjtök sjneller as alle Feesnaeskes wolle... Mer ja, ins is 't veurbiej. Veurdet de Biemösj om 24.00 oer verbrandj waerde, zeen v'r nag flink d'r taenge-aan gegaon. De dansmarietjes höbbe nag ins gedans veur 't broedspaar Chris en Fieke en as kedootje krege de broedegom en zien broed eine ganse doorsjlaag vol mit sjpekjes. Det vonge zie heerlik. Om efkes veur twellef oere sjtinge alle naeskes (die nag neet in bid loge) oppe bühne mit de Prinsepare vanne Biemösje en Dorsjvlaegels en de twee zaate hermeniekes. Det woor heel sjiek. Mit 't Biemösj verbranje vonge sommige Feesnaeskes 't dan auch zo jaomer det 't vastelaovessezoen veurbiej woor, det ze ein paar träönkes höbbe gelaote. Eine dieke knoevel hulp dan gelökkig. 't Sezoen zit d'r trouwes nag neet gans op veur de naze. V'r gaon nag eine keer mit zien alle frietjes aete...

Geschreven door: Hanneke op 2012-02-26 om 22:15:27


Feesnaeskes verwinne ridder Henk (Schmitz)
Wie de Feesnaeskes heurde det grootvors Henk (Schmitz) vanne Biemösje mit ziene voot in 't gips zoot deze vastelaovend, wolle ze 'm toch efkes extra verwinne. Veur de Buujelemiddig höbbe Prins Bas, Prinses Ody, Vors Shirley en de Adjudante ein fijn fruitmanj nao Henk gebrach. Heim woor d'r neet, hae zoot lekker Biej Liebes. Henk woor erg verras en heel bliej mit 't fruit. Hae veulde zich geliek ein sjtök baeter en haet alle Feesnaeskes (via de leiding) getrakteerd op ein lekker glaeske fris.

Geschreven door: Hanneke op 2012-02-26 om 22:04:17


Feesnaeskes oppe televisie (RTL4)
't Is ech waor! De Feesnaeskes zeen oppe televisie gewaes. Kiek mer nao 't bewies:



V'r krege auch nag eine leuke mail vanne maker vanne foto. Laes mer: 

Beste Feesnaeskes,
Jullie zijn voor het derde jaar achtereen op TV geweest met jullie schitterende vliegtuig. Deze zeer mooie kar nodigt uit om veel foto’s van te maken tegen de blauwe lucht!!!!!!! De foto op TV zat bij het Weer, achter Editie NL rond 18.30 uur, gepresenteerd door Reinier van de Berg. Ik heb bijgaande foto vanaf de beeldbuis gemaakt. Fijne carnavalstijd en veel plezier, Ajan Everstijn.

Tof hè? V'r zeen in gans Nederlandj beroemd!
Geschreven door: Hanneke op 2012-02-24 om 15:59:44


Optoch en nao de kirmes
Jidderein wit waal det de Feesnaeskes eine keivette wage höbbe. Alle naze vonge 't dan auch heel sjoon om dao op te moge sjtaon. Eers hawwe v'r nag efkes gein geluud, want de aggregaat haw 't begaeve. Gelökkig holp de firma Heijmans os oet de nood en krege v'r nag tiedes de optoch eine nuuje... kosjte v'r toch nag danse en sjpringe onger de optoch. Chill det zoväöl luuj langs de waeg sjtinge te kieke...



Nao de optoch zeen v'r efkes in 't KA-Hoes ein Prinselik breudje gaon aete. Daonao zeen v'r mit zien alle nao de kirmes gewaes. Supergezellig mit zien alle inne rupsj en biej de grieperkes. Wie v'r allemaol dol wore, zeen v'r nag inne Beuk gewaes feeste. De dansmarietjes höbbe häöre dans toen auch nag ins gedaon!

Geschreven door: Hanneke op 2012-02-24 om 15:37:09


Buujelemiddig mit väöl prinsesse
De twidde Buujelemiddig woor superleuk. Heel väöl jonges en maedjes hawwe zich de meujte gedaon om zich te verkleije in 't thema 'sjprookjes'. En ein echte jonkvrouwe kwoom in 't KA-Hoes veur ballonnefigure veur os te make. Sjiek man. Eine flinke sjtoet troch doer 't dörp op waeg nao 't plein biej de PLUS. Dao wore hongerde rood, gael en greune ballonne opgeblaoze mit helium veur op te laote. V'r zeen erg benuujd welke ballon 't wiedste is gevlaoge en waem die twee kaertjes veur de Efteling (gesjponsord doer café Biej Liebes) wint. De eerste kaertjes beginne teruuk te komme... Inne Beuk höbbe v'r nag efkes gefees en waerde auch de bes verkleide jonges en maedjes bekind gemaakt: 3) Aniek Moors, det moog frietjes gaon aete biej Friture Lispet; 2) Thaura van Heel, det moog gaon bowle en frietjes aete op 't Hitje (Landal); 1) Roy Schoenmakers, dae haet ein sjiek arrangement van PeeWee gewonne.

 1) Roy Schoenmakers  2) Thaura van Heel  3) Aniek Moors










Wilt g'r alvas weite wat g'r veur Vastelaovend 2013 veur ein pekske mot make/kaupe? 't Thema vanne Buujelemiddig is dan 'Reis rondj de waereld in drie daag'. Doe kins dan dus as Duitser of Oosterieker komme, as Italiaan, Spanjaard, cowboy of indiaan, as Eskimo of mesjien waal geweun as Hollenjer. Bao alles kin! Doot good uch bes, want auch dan zeen d'r geweldige prieze te winne.



Geschreven door: Hanneke op 2012-02-24 om 15:10:03


Vriedig mit vaer! activiteite
V'r höbbe ech neet sjtil gezaete mit de Vastelaovesdaag. Veural vriedig woor eine hele drökke daag. Eers ginge v'r mit mit de kinjeroptoch. Dit jaor hoofde v'r ins neet zelf te zinge, want de leiding haw ein waegelke (mit dank aan Paul van Elmpt) én ein nuuj geluidsinstallasie geritseld. Kosjte v'r lekker de ganse optoch danse op 'ai det is jovel' en 'dreije mit det vötje'... Alle jonges en maedjes hawwe good häör bes gedaon, want 't woor eine hele mooie optoch.



Einmaol aangekomme biej 't KA höbbe v'r duchtig gefees. Väöl tied veur biej te komme hawwe v'r neet, want d'r mosj nag gewirk waere: flesje verzamele en inlevere biej de PLUS. V'r höbbe meer as 300 flesje en 7 kratte beer doer det mesjien geduujd... Good hè? En nag ein deil flesje motte v'r inlevere biej anger supermerte. Van al det helle wirk krieg se honger. Det haw Prins Bas good ingesjat, want hae haw os oetgeneudigd om biej hem heim nonnevotte te aete. Dao bleef 't neet biej, want d'r wore auch keekjes, greune keek en anger lekker dinger. Det haet os good gesjmaak en de batteriej woor zo weer opgelaaje. Kosjte v'r nag efkes polonaise in en om 't Prinselik paleis laupe... Auch höbbe de Feesnaeskes nag buskruitje gedaon.




's Aoves zeen v'r auch nag nao de Vastelaovesaovend van Voluntas, HCP en PSV35 gewaes. Sjoon det drie sjportclubs zich biejeinpakke veur get te organisere. V'r zeen nag duchtig draan gegaon en daonao hawwe v'r de knuip aaf. Gelökkig woor zaoterdig eine röstig-aan-daag veur biej te komme.

Geschreven door: Hanneke op 2012-02-24 om 14:48:01


Sjpringe sjpringe en nag ins sjpringe wie ein bees...

't Is efkes sjtil gewaes mit nuujts. Det kumpt omdet de Feesnaeskes en auch de leiding 't väöllllllllll te drök höbbe gehad mit feeste... Waal höb g'r gelökkig de foto's kinne bekieke. Wo wore v'r gebleve... op donderdig 16 fibberwari. Doe zeen v'r mit de Feesnaeskes nao de carnavalsaovend van Roncalli en 't Meisjesgilde gewaes. Det woor ein dieke party. Veural höbbe v'r geoefend op 't leedje 'Ai det is jofel' van Roy Selder. Dao kinne v'r ein heel leuk dansje biej! Auch woor d'r ein vastelaoveskwis, veur echte feesnaze wie veer woor det netuurlik hersjtikke mekkelik!

Geschreven door: Hanneke op 2012-02-24 om 14:12:14


Help! 't Lökt mich neet om foto's te kieke...
Veer heure van väöl luuj det 't häör neet lök om via de site vanne Feesnaeskes nao de foto's te kieke...
Gelökkig höbbe v'r ein oplossing. Gank nao
www.oypo.nl/fotokahuis. Dao kin-se alle foto's zeen. Waal auch nag ins teruukkomme nao de Feesnaeskes-site, want hiej vingk g'r 't letste nuujts.
Geschreven door: Hanneke op 2012-02-17 om 17:52:01


Filmpkes bezeuk carnavalsaovend DanceBeat
De Feesnaeskes zeen deesdigaovend op bezeuk gewaes oppe carnavalsaovend biej DanceBeat in 't KA-Hoes. Det woor supergezellig. Kiek mer ins nao de filmpkes inne 'videotheek'!!! Doe vings de 'videotheek' links in 't menu.
Geschreven door: Hanneke op 2012-02-15 om 22:33:40


Drök weekend mit Bontje Aovend en Resepsie Biemösje

De Feesnaeskes höbbe ein drök weekend achter de rögk: zaoterdig höbbe v'r os geprizzenteerd oppe Bontje Aovend vanne Biemösje en zönjig zeen v'r nao de Resepsie van de Biemösje gewaes. Eers nao zaoterdig. Doe höbbe os dansmarietjes Aniek, Delana, Femke en Fenna ein geweldig optraeje gegaeve. Eers waerde zie fijn opgetut doer Marlies (Konings-Esser) en nao nag efkes geoefend te höbbe mit dansjuffe Anka en Nadja (Konings), wore ze d'r gans klaor veur. De zaal woor razend enthousias!

 
Os marietjes mit dansjuffe Anka en Nadja.

Zönjig mosjte v'r mit alle naeskes in aksie komme veur Prins Eric en Prinses Angelique te fillicitere. Netuurlik höbbe v'r os Feespolonaeske gedaon en daonao haet Shirley ein supergooie toesjpraak gehawte. Det ging zo good det alle Biemösje os belaof höbbe om flesje in te zamele veur os aksie! Prins Eric en Prinses Angelique krege ein feesnaas, ein medalie én ein röndje van Prins Bas.

 
Vors Shirley hilt ein toesjpraak.

Vandaag (maonjig) röste alle Feesnaeskes good oet, want v'r motte d'r kommende dage flink taenge-aan. Morge gaon v'r nao de Vastelaovesaovend van DanceBeat! Jippie! En netuurlik motte v'r auch nag flink flesje verzamele dees waek...

Geschreven door: Hanneke op 2012-02-13 om 17:48:17


Feesnaeskes hawte flesje-aksie

De Feesnaeskes höbbe uch hölp neudig. Veer verzamele zoväöl meugelik laege flesje (die se kins inlevere biej de Plus). ’t Geldj det v’r verdene as v’r ze inlevere, is bedoeld veur eine nuuje Prinsewage veur kommend jaor. G’r sjnap waal det eine sjieke wage erg duur is, dus v’r höbbe heel väöl flesje neudig.
Begin alvas te verzamele, op vriedigmiddig nao de sjoolcarnaval kint g’r de flesje inlevere biej de leiding vanne Feesnaeskes (15.30 oere biej de Plus veur). Alvas bedank veur uch hulp!
Geschreven door: Hanneke op 2012-02-07 om 22:49:39


Mit de Feesnaeskes nao de Dialekmis & de Dorsjvlaegels
Zaoterdig 4 fibberwarie woor eine drökke daag veur de Feesnaeskes... 's Morges höbbe de dansmarietjes geoefend en haet de leiding same mit de boewers de wage gemaak. 's Aoves zeen v'r nao de Dialekmis gewaes én nao de resepsie van Prins Nick en Prinses Iris vanne Dorsjvlaegels. In de kirk haet Prins Bas veurgelaeze en höbbe alle Feesnaeskes flink mitgesjoenkeld mit de Binneste Boete Bandj. Meneer Pesjtoor vong os zelfs 't biste van jidderein. Biej de Dorsjvlaegels mosjte v'r bès waal lang wachte, zo lang det väöl paps en mams al kwome veur aaf te haole. Ach ja, kosjte zie auch nag efkes feeste. Vors Shirley haet auch ein hele gooie speech gehawte, gans zellef gesjreve. Heel knap. Ein paar foto's vingk g'r hiej onder (de res sjteit in 't fotoalbum):



Geschreven door: Hanneke op 2012-02-05 om 02:40:18


Hoeze in Postert sjoon versierd
Postert kleurt langzaam rood, gael en greun (en nag heel väöl anger kleure). De eerste sjoon versierde rame en tuine höbbe veer al gezeen biej ozze Prins Bas (dae same mit awt-Prins Remon en awt-Vors Aniek haet ligke "kliedere") en oos Prinses Ody. Hiejonger zuus-se de rame van Bas en Ody.


 


Neet allein de Feesnaeskes doon erg good häör bes om 't dörp te versiere. Auch alle angere kinger van Postert zeen volop bezig. Kiek hiejonger mer ins nao de raam van Nina Piper (Varenweg). Det haet zien kunswerk zelfs aangepas aan de sjpreuk van Bas en Ody, want Teigetje sjpringk auch wie ein bees. Heel knap en leuk gedaon! Haes dich auch diene raam of tuin sjiek versierd? Sjtuur ein foto nao
feesnaeskes@live.nl, dan zette v'r 'm auch op dees site!

Geschreven door: Hanneke op 2012-02-01 om 22:40:19


Hiej is d'r dan: nuuje prinsefoto
Hiej is d'r dan: de nuuje prinsefoto! Made by Peter Schouwenberg oet Hirkebosj. Sjiek woh?

Geschreven door: Hanneke op 2012-02-01 om 22:28:05


Smile! Oppe foto in Hirkeboosj
Ein bietsje vastelaovesvereiniging haet auch ein prinsefoto. Dus deesdigaovend ging de leiding vanne Feesnaeskes mit Prins Bas en Prinses Ody (en de mams) nao Hirkeboosj veur eine fotosjoet. Det lache woor gein inkel probleem veur Bas en Ody, want die zeen nag sjteeds hersjtikke bliej det ze dit jaor 't Prinsepaar vanne Feesnaeskes moge zeen. Fotograaf Peter Schouwenberg haw ze zo d'r op sjtaon. Al woor 't waal efkes wenne om zo dich biejein te sjtaon... De foto's zeen heel sjiek gewaore. Bös se benuujd? Kom dan gauw teruuk om te kieke op dees site. Op dit moment waere de foto's namelik nag efkes aafgewirk.
Geschreven door: Hanneke op 2012-01-25 om 21:50:26


Bas en Ody gaon sjpringe wie ein bees
Op zónjig 22 jannewari waerde in ein boemvol KA-hoes ’t nuuje Prinsepaar vanne Feesnaeskes oetgerope: Prins Bas I (Bontekoe) en Prinses Ody (Schmitz)! Prins Bas I is van Cees (mit ein C) van Jan vanne Bontekoe en Pietsje van Douwe Piepke oet Dokkum en van Agnes van Pierre Beunen oet Sint Joas en Lies vanne Brachterziej. Eine ganse mondj vol wôh? En Prinses Ody is van Peter van Huub van Pie van Wiersj en van Anita van d’r Wiel van d’r Pieëtesj oet Winthage.

Det zie good kinne feesviere, bliek waal oet häöre sjpreuk:

MIT OOS IS ’T ALTIED FEES,
WANT VEER SJPRINGE WIE EIN BEES!

Prins Bas en Prinses Ody waere ´t kómmende jaor ongersjteund door Vors Shirley (Schmitz), adjudante Daniek (van Appeven) en Tessa (Willems), Nar Roan (Thoolen), ós Dansmarietsjes en netuurlik de Raod van Ellef. Veer gaon d’r same mit de Dorsjvlaegels en Biemösje eine hele sjone Vastelaovend van make! Toet sjnel in ’t KA-Hoes!
Geschreven door: Hanneke op 2012-01-22 om 21:46:01


Nuuj dansmarietjes oefene superdans!
De Feesnaeskes höbbe vaer nuuj dansmarietsjes: Femke (Visschers), Delana (Sevenich), Fenna (Sevenich) en Aniek (Meijers). Wat geer neet wit, is det zie zaoterdig (21-1) al heel hèl geoefend höbbe op häöre dans. 't Waert super vet! Mede dankzij awt-Prinses Anka, wat de leiding vanne Feesnaeskes auch dit jaor weer hulp mit de dans verzinne en oefene. Op welk leedje de dansmarietsjes danse? Tja, det blief ein verrassing toet de Bontje Aovend. Komme kieke dus!
Geschreven door: Hanneke op 2012-01-22 om 21:26:41


Recordaantal aanmeljinge veur Feesnaeskes 2012
't Woor weer ontzettend drök gonsdigaovend 18 jannewari in 't KA-Hoes biej de insjrieving veur de Feesnaeskes. Mer leefs 44 kinger wolle dit jaor waal mittrèkke mit de leukste kingervastelaovesvereiniging van gans Postert, terwiel d'r mer veur 21 jonges en maedsjes pekskes zeen... Biej de aanmeljinge zote 8 Prinse en 18 Prinsesse. De kans det-se Prins of Prinses waers, is dus maar heeeeeeeeel klein. Auch dansmarietje wolle väöl maedsjes waere, dao höbbe zich 11 kinger veur aangemeldj. 't Leefs leet de leiding vanne Feesnaeskes jidderein mitdoon, mer det geit helaas neet en dus höbbe v'r dit jaor weer motte laote.

Alle kinger kriege donderdigaovend 19 jannewari ein breefke in de bös mit 't sjlechte nuujts (doe bös d'r neet biej) of 't gooie nuujts (doe bös ... gewaore). Netuurlik haopt de leiding det alle kinger die neet zeen ingelaot, toch mit komme doon mit de vastelaovend! Bös dich benuujd waem de nuuje Prins en Prinses, Vors, Adjudante, Nar, Dansmarietjes en Raodslede waere? Kom dan zönjig 22 jannewari nao 't KA-Hoes. Van 14.11 toet 17.11 oere is 't fees!
Geschreven door: Hanneke op 2012-01-18 om 22:43:22


Feesnaeskes klaor veur Vastelaovend 2012
´t Nuuj jaor is begósj, dus de Feesnaeskes komme weer in actie! Nao ein knallend 2 x 11-jäörig jubileum in 2011 mit oos Prinsepaar Remon en Tessa, gaon veer op nao de volgende 11 jaor (en wiejer)!

Oos eerste activiteit is zo wie altied ’t Prinsebal, dit jaor op ZÔNJIG 22 JANNEWARIE. Dao waere de opvolgers van Remon en Tessa oetgerope, en auch oze nuuje Vors, Adjudante, Nar, Dansmarietjes en Raod van 11! Wils doe dit jaor mit de Feesnaeskes same veurop in de Posterse Vastelaovend? Sjrief dich dan in op GONSDIG 18 JANNEWARIE in ’t KA-Hoes. De insjrieving doert van 19.30 toet 20.30 oere. Doe kins dich insjrieve es-se in groep 5, 6, 7 of 8 vanne Basissjool (of ’n anger sjool) zits en in Postert woons. Eerder, later of tillefonisch insjrieve kin helaas neet, want oppe zelfde aovend waere alle nuuj Feesnaeskes oetgelaot. Gaef dich op en missjien waers doe waal oetgerope tiedes ‘t Prinsebal!

Dees waek krieg geer op sjool ein informasiebeukske, wo alles in sjteit was-se wils weite! Kiek auch ins op ós website: www.kahuis.nl/feesnaeskes!

PS: ’t thema van de BUUJELEMIDDIG op Vastelaoveszônjig is dit jaor “SJPROOKJES”. Alle Hekse, Wolve, Geite, Hansjes, Grietjes, Prinse (auch Kwekkerte), Prinsesse (al dan neet mit Erwte), Rooi Kepkes, Oma’s, Jaegers, Goudlökskes, Sjneewitjes, Dwerge, Daorereuskes, Klein Duumpkes, Reuze, Leve en Kwaoje Sjtiefmooders, Gelaarsde Katte, Zeemeerminne en anger sjprookjesfigure zeen dan welkom in ‘t KA-Hoes. Zorg alvas veur ein sjoon pekske, want d’r zeen leuke prieze te winne!
Geschreven door: Bas op 2012-01-08 om 20:00:56


Feesnaeskes present op 't Kinger-BCL Treffe

De Feesnaeskes zeen in november nao 't Kinger-BCL Treffe in de Beuk in Postert gewaes. Det woor ein groot feesje mit as knallende aafsjloeter: Big Benny! Klik HIEJ om ein filmpke te bekieke.

Geschreven door: Hanneke op 2012-01-07 om 00:42:06


Gesjpronge wie haeskes
Wauwie! Wat höbbe veer ein te gek jubileumsezoen gehad. Hersjtikke sjiek. Mit die daag höbbe veer os geweldig good geammezeerd. Veer zeen al op deesdig begoosj mit ein bezeuk aan de vastelaovesaovend van DanceBeat/Afa Miranda. Oppe donderdig hawwe veer ein gesjlaagd fees biej Roncalli en ’t Meisjesgilde. Wie vriedigmiddig de kingeroptoch door ’t dörp trok wore veer dan auch good werm gedreijd. Geer höb os vas waal os FeesPoloNaeske heure zinge tiedes de optoch. ’s Aoves hawwe v’r d’r nag lang gein genog van en zeen veer biej Voluntas verder gaon feeste in ’t KA-Hoes. Oos Dansmarietjes höbbe dae vriedig waal vaer keer opgetraoje. Zaoterdig hawwe zie en auch Prins Remon, Prinses Tessa en alle angere Feesnaeskes dus waal efkes eine rösdaag neudig…

Fris en mit gooie zin kwome alle Feesnaeskes zönjigmiddig nao ’t KA-Hoes veur de allereerste editie vanne Buujeletrèk. Keivet det jidderein zich zo good verklèd haw as piraat. Alle jonges en maedsjes höbbe zich vermaak mit ’t kingertheater euver Kapitein Bonk en höbbe tiedes de optoch eine rooie, gaele of greune ballon opgelaote. Veer höbbe al heel get kaertsjes teruukgesjtuurd gekrege, mer wachte nag ein paar daag aaf of nag meer binne kump. De jong of ’t maedsje wovan de ballon ’t wiedste haet gevlaoge wint eine fijne pries: mit oppe wagel vanne Biemösje, Dorsjvlaegels of Feesnaeskes tiedes de halfvasteoptoch én twee kaertsjes veur de Efteling. Auch de sjónst verklèdde piraatjes (Lars Theunissen, Guusje Derix en Nina Piper) höbbe eine pries gewonne. Wilt geer weite wat veur pekske geer volgend jaor neudig höb oppe Buujeletrèk? ’t Thema is in 2012 sjprookjes. Dus doe kins as prinses komme, as kabouter, heks, kikker, fee, Roodkapje, wolf, boze stiefmoeder, jager, draak, Hans of Grietje, oma, Klein Duimpje, Raponsje, Zwaan-kleef-aan en gangk zo mer door. Meugelikhede genóg, jidderein haet veur dit thema waal get oppe zolder inne verklèjdoos zitte.

Maonjig woor de grote optoch. Sjoon det zoväöl luuj nao oze sjieke wage zeen komme kieke. Os wageboewers höbbe weer good häör bes gedaon hè? Tiedes de halfvasteoptoch op 3 april kint geer ‘m nag ins bewonjere. Nao de optoch höbbe veer mit de Feesnaeskes lekker breudjes gegaete en zeen nao de kermis gewaes. Mit zien alle inne rups, keigezellig. Wis geer trouwes det oze nar Luuk Vastelaovesmaonjig jaorig is gewaes? ’s Aoves haet de leiding same mit de F.O.P. (Feesnaeskes Ongersjteunend Personeel) nag ein vriegezellefees gehawte veur oos Boerebruudsje Marlies (Konings). Vongk geer trouwes neet det de Feesnaeskes sjiek hawwe versierd biej Marlies?

Gelökkig wore Peter en Marlies deesdig neet al te brak nao häör vriegezellefees en kosjte geweun trouwe, zodet de Feesnaeskes auch flink kosjte sjpringe op häör resepsie en fees. ’t Woor zo leuk, det bao alle Feesnaeskes mosjte janke wie de Biemösj verbrandj waerde om twellef oere. Hersjtikke jaomer det ’t sezoen d’r alweer opzit. Gelökkig hawte die grote Biemösje eine extra optoch en ’t BCL in november. Dus d’r zit nag get in ’t vaat. Veer wille jidderein bedanke wat os jubileumjaor toet noe toe toet zo’n enorm succes haet gemak: van leedjesopnummer toet pekskesneijster en van wageboewers toet tractorsjauffeur. Bedank! ’t Woor ramvet!
Geschreven door: Hanneke op 2011-03-13 om 13:16:20


Feeste, feeste, feeste (en versiere)
Veer höbbe alweer vanalles mitgemak dees daag! Donderdig zeen veer mit zien alle nao de carnavalsaovend van Roncalli en 't Meisjesgilde gewaes. Det woor superleuk! En vriedigmiddig ging de optoch vanne sjool. Omdet d'r geine meziek woor, höbbe veer mer zelf heel döks os leedje gezonge. De luuj naeve de kantj van de waeg vonge os heel good. Daonao höbbe veer nag efkes in 't KA-Hoes gesjpronge en netuurlik höbbe auch os dansmarietsjes Peggy, Guusje, Jill en Noëll opgetraoje. Zie kinne de dans noe helemaol perfek. Vriedigaovend biej Voluntas höbbe ze 'm VAER!!! keer gedaon. De angere Feesnaeskes en de miensje inne zaal höbbe good mitgedaon, mer zien kinne 't neet zo sjiek as os dansmarietjes. Die zeen toch ech 't beste!
Nao de sjoolcarnaval zeen ein deil Feesnaeskes en Dana in 't dörp blaedjes gaon ophange veur de Boerebroelig. Veer höbbe zelfs blaedjes oppe bös geplek en oppe verkiezingsposters... sjtiekem. Det woor bes grappig. Daonao höbbe veer biej Vors Aniek en Raodslid Bas nag get gedronke en ein lekkere nonnevot gegaete. Vandaag (zaoterdig) is eigelik rösdaag... mer ja... biej os Boerebroed Marlies mosj nag ein bietje versierd waere. Sinds ein uurke hange aanne hek van Marlies supersjieke teikeninge van alle Feesnaeskes. Jidderein trapt oppe rem om daonao te kieke. Wilt geer foto's zeen van al die activiteite? Gangk dan nao de Feesnaeskes-hyve: 
http://www.hyves.nl/hyves/9642436/KCV_De_Feesnaeskes/
Geschreven door: Feesnaeskes op 2011-03-05 om 12:05:11


FOP (Feesnaeskes Ongersjteunend Personeel) levert Boerebroed
Apetrots zeen veer op os Boerebruudsje Marlies (Konings). Want geer höb ’t mesjien neet gans mitgekrege oppe Bontje Aovend, mer Marlies en auch zien vader Chris (Bongers), mooder Jacqueline (Aelen) en tuug Paul (Fijten) zeen lid van de FOP. De FOP? Jao, ’t Feesnaeskes Ongersjteunend Personeel. Al dees luuj, en nag väöl meer, helpe de leiding achter de sjerme mit vanalles en nog get. Dansmarietjes sjminke, wages boewe. Nieks is te gek. En daorom wille veer häör mit de Boerebroelig in ’t zönke zette. Komp geer os helpe?

Oet betroewbare bron höbbe veer vernaome det Marlies hersjtikke verleef is op ziene broedegom Peter (Schmitz). De kouwe kantj vanne femiliej heurt biej buurtvereiniging De Donk.
Geschreven door: Hanneke op 2011-03-02 om 22:23:05


Oos dansmarietjes gezeen oppe Bontje Aovend en Receptie?
Yes! Eindelik geit ’t loos. Vanaaf donderdig gaon de Feesnaeskes non-stop draan toet sjloete. Det veer good kinne feeste höb geer aafgelaupe waek kinne zeen oppe Bontje Aovend en oppe reseptie vanne Biemösje. Vongk geer os dansmarietjes Peggy (Schmitz), Guusje (Bindels), Noëll (Hoven) en Jill (Willems) auch zo ontzettend good? Waeke höbbe zie geoefend op ‘Hello’ en ’t geit supergood. Veer haope det geer dees daag flink mit os marietjes mitdans.

Noe zeen die dansmarietjesdanspeskes bes lestig… Lök ’t neet zo good, dan moog geer auch geweun kieke en mitklappe. Of geer gaot geweun mit in os FeesPoloNaeske. Det is os sjpiksjplinternuuje leedje. Wilt geer alvas oefene inne hoeskamer? ’t Ceedeetje is verkriegbaar biej de Plus, biej Maraise van Sanna en biej de leiding vanne Feesnaeskes veur vief euro. De opbrings van ’t ceedeetje geit gans nao de Feesnaeskes. Wilt det geer det veer blieve sjpringe, kopieer ’t leedje dan neet sjtiekem, mer kaup ein exemplaar veur sjlechs vief euro.

Geschreven door: Hanneke op 2011-03-02 om 22:13:35


Drök Drök Drök
De Feesnaeskes höbbe 't aafgelaupe waek hersjtikke drök gehad. Daoróm is 't efkes sjtil gewaes op dees site.
Wat höbbe veer allemaol gedaon (in 't heel kort):
- Os dansmarietjes Peggy, Guusje, Noëll en Jill höbbe same mit awt-prinses Anka geoefend aan häöre dans
- Prins Remon en Prinses Tessa zeen mit Hanneke en de mams nao fotograaf Peter Schouwenberg in Hirkeboosj gewaes veur ein sjieke Prinsefoto te make. Ze sjtaon d'r héél knap op.
- De leiding is drök bezig gewaes mit 't make van de ceedeetjes. Hoesje ontwerpe, hoesje laote drökke, hoesje vouwe, hoesje in ceedeetje doon... poeh hee. En dan auch nag ins vergadere euver de Buujelemiddig mit de Biemösje, breefkes make veur de Feesnaeskes, ein nuuj, groter Prinsepak veur Remon regele (det anger woor ein bietsje te klein), en nag väöl meer...
- Vors Aniek is same mit Marcel biej de grote Vors Sven gewaes veur te oefene.
- Veer höbbe oose jubileummiddig gehad... mer dao-euver kump dalik meer in ein apart sjtökske...
Geer leus 't: veer zitte neet sjtil.

Geschreven door: Hanneke op 2011-02-12 om 15:55:42


Wo blieve die foto's???
Wo blieve die foto's? Det zolt geer uch waal aafvraoge... Nou, det zit zo. D'r is get geks mit de site aan de handj. 't Lökt neet meer om foto's d'r op te zette... Heel erg irritant, mer gelökkig waert d'r door 't website-mannetje aan gewirkt. Toetdet 't gemak is, zette v'r foto's zolang oppe Feesnaeskes-hyves die is opgezat doer awt-Vors Sabine. Netuurlik moog geer auch 'vriendjes' van os waere op dae hyves: www.hyves.nl/hyves/9642436/KCV_De_Feesnaeskes/
Geschreven door: Hanneke op 2011-01-31 om 15:33:00


Ein FeesPoloNaeske
Geer zolt 't neet geluive, mer 't is toch gelökt om 't nuuje leedje op te numme. Marcel en Bas hawwe 't zelfs ruum oppertied aaf (17.00 oere zónjigmiddig). Mit borsj veuroet, veurwaarts marsj, höbbe al ós 21 poete mitgezonge inne studio. En veer wille neet opsjöppe, 't is ein héééééééééééééél leuk leedje gewaore. Mit heel väöl dank auch veur Rik van Bree. Rik: bedank! Noe gaon veer drök aan de sjlaag mit 't make van hoesjes en auch mot de cd nag gedrök waere. Veer probere 'm tiedes ozze jubileummiddig aansjtaonde zónjig aaf te höbbe en netuurlik mit väöl tamtam te prizzentere.
Geschreven door: Hanneke op 2011-01-31 om 12:06:39


Help... Bas en Marcel make ein leedje...
Geer höb 't vas al gezeen in os programma of gelaeze in 't Posters Waekblaad. De Feesnaeskes gaon ein nuuj leedje opneme. Det geit morge (zónjig 30 jannewari) gebeure... Ein probleem: 't leedje is nag neet aaf. Ich (erme Hanneke) zit noe in ein hoes mit Marcel en Bas die allein nag mer dinger as 'pompompom' en 'zakzakzak' zegke. Verder is d'r eine haup herrie te heure. As det mer good kump...
Geschreven door: Hanneke op 2011-01-29 om 20:54:20


Geine Kloonetrèk, mer... Buujelemiddig
Alle buujelkes van Postert opgelet! De Feesnaeskes en de Biemösje gaon ein gans nuuj, sjpetterend fees veur uch hawte op Vastelaoveszónjig (6 maart), want zègk noe eerlik, die kloonepekskes zeen óngerhandj aan vervanging toe. Wat geit d’r gebeure: Postert krieg eine echte Buujelemiddig wo vanalles te belaeve is veur kinger. Jidder jaor krieg de Buujelemiddig ein anger thema. In 2011 is det: pirate. Jidderein moog dus es piraatje nao ’t KA-Hoes kómme.

Om precies èllef op twee barst ’t fees los in ’t KA-Hoes. Dao sjpeelt kingertheatergroep À propos om half drie de veursjtelling ‘Eilandj vol gevaore’. Kapitein Bonk en Simon Sjnotje höbbe get geheurd euver ein eilandj ver van Postert wo ein echte sjat ligk… Al det goud en die juwele wille die twee netuurlik waal höbbe, mer de reis nao det eilandj is heel geveerlik. Daorom moge alle kleine pirate mit op ’t avontuur om te helpe.

Nao de veursjtelling gaon veer flink aan de rum (laes: limmenaad) en lekker danse en sjpringe. Rondj ein oer of half vief vertrèkke alle pirate in eine grote sjtoet nao de Mèrt wo de kinger eine ballon kriege veur eine
ballonnewedsjtried. As alle piraatjes ein kaertsje aan häöre ballon höbbe gemak, laote v’r ze allemaol tegeliekertied op. De jong of ‘t maedsje wo de ballon ’t wietste van vluug, wint eine superpries. De winnaar moog namelik tiedes de Halfvaste-optoch mit oppe wage vanne Feesnaeskes, Dorsjvlaegels of Biemösje (doe moogs zellef keze) én wint twee kaertjes veur de Efteling. Sowieso krieg jiddere deilnummer ein sjieke medalie!

As v’r de ballonne neet meer zeen vleege, trèk de optoch wiejer nao de Beuk. Dao feeste v’r nag efkes lekker doer én d’r zeen nag meer prieze te winne. Tiedes de sjtoet keeze de Prinsepare vanne Feesnaeskes, Dorsjvlaegels en Biemösje namelik de
bès verklèdde pirate oet en die winne vètte prieze:
1e pries: eine enorme wisselbaeker én ein kingerfeesje veur zès persone biej PeeWee
2e pries: bowle en frietjes aete biej Brasserie Timber’s (op ’t Hitje) mit de ganse femielje
3e pries: frietjes aete biej Lispet mit de ganse femielje

Alle kinger kriege nao de priesoetreiking ein lekker sjlókzekske en dan feeste v’r nag efkes doer. ’t Waert hersjtikke gezellig, dus kom op Vastelaoveszónjig nao de Buujelemiddig!
Geschreven door: Hanneke op 2011-01-29 om 15:15:47


Tadaaaaaaaaa: Prins Remon I en Prinses Tessa nuuj Prinsepaar
Vanmiddig (zónjig 23 jannewari) höbbe veer in ein boemvol KA-hoes ’t nuuje Prinsepaar vanne Feesnaeskes oetgerope: Prins Remon I (Buitenhuis) en Prinses Tessa (Willems)! Det gebeurde netuurlik weer mit ein raar toneelsjtökske vanne leiding, die ein feesje hawwe veur 't 2 x 11 jaorig jubileum. Lijdor Bas dach nag det d'r nemes op 't feesje zou komme, mer opins sjtinge ein heel deil awt-Prinse en awt-Prinsesse aane deur... Dingdong... Die hawwe ein groot cadeau biej zich mit dao-in 't Prinsepaar. Prins Remon I is van Roger van Jo van Miel vanne Bekker oet Leeve en van Dani van Jan van Jan vanne Kruitzer vanne Varsj. Eine ganse mondj vol wôh? En Prinses Tessa is van Marcel van Piet vanne Sjnieder en van Monique vanne Sjilder vanne Varsj. Det zie good kinne feesviere, bliek waal oet häöre sjpreuk:

DEES TWEE POETE,
GAON DRAAN TOET SJLOETE!


En trouwes, det höbbe veer auch al gezeen, want d'r is al flink gesjpronge mit alle Feesnaeskes. Prins Remon en Prinses Tessa waere ´t kómmende jaor ongersjteund door Vors Aniek (Bontekoe), adjudante Pedro (Thegels) en Shirley (Schmitz), Nar Luuk (Mingers), ós Dansmarietsjes en netuurlik de Raod van Ellef (kiek auch onger 'lede Feesnaeskes 2011'. Veer gaon d’r same mit de Dorsjvlaegels en Biemösje eine hele sjone Vastelaovend van make!
Geschreven door: Hanneke op 2011-01-23 om 21:00:15


Nuuj ongerdeil website: lies Awt-Feesnaeskes
Vanwaege os jubileum, dit jaor besjtaon de Feesnaeskes 2 x 11 jaor, zeen veer ins gaon sjpitte in de archieve. Daobiej zeen veer de ledelieste vanne Feesnaeskes taenge-gekomme. Zelfs oet de allereerste jaore... Aan de handj daovan höbbe veer ein lies gemak mit jidderein dae oots biej de Feesnaeskes is gewaes. Bös-se nuujsjierig? Kiek dan in 't menu biej 'Awt-Feesnaeskes'!
Geschreven door: Hanneke op 2011-01-23 om 00:56:22


Nag ein nachje sjlaope
Ooooooooooh,.. Veer zeen hersjtikke zenuwechtig. Morge geit 't dan toch ech gebeure. Nag mer ein nachje...en dan rope veer de Jubileumprins en -prinses vanne Feesnaeskes oet. Ze höbbe d'r al ontzettend väöl zin in en höbbe eine supervette sjpreuk bedach. Auch de proklamasie is al vaerdig... Ein probleempje: d'r is nag gein toneelsjtökske. Zou 't goodkomme? Kom morge (zónjig 23 jannewari dus) kieke in 't KA vanaaf 14.11 oere. Dan wit-se auch geliek waem de nuuje Prins en Prinses waere...Ein paar hints euver óze Prins: ’t is eine echte Posterse jong, dae flink kint feeste. Hae zit in Postert oppe Draaiende Wieke en zien Prinses auch. Zie zeen allebei tösje de 8 en 12 jaor awt. Wit g’r ’t al?
Geschreven door: Hanneke op 2011-01-22 om 18:39:33


Héél väöl aanmeljinge veur Feesnaeskes 2011

't Woor weer ontzettend drök maonjigaovend 17 jannewari in 't KA-Hoes biej de insjrieving veur de Feesnaeskes. Mer leefs 36 kinger wolle dit jaor waal mittrèkke mit de leukste kingervastelaovesvereiniging van gans Postert, terwiel d'r mer veur 21 jonges en maedjes pekskes zeen... Biej de aanmeljinge zote 7 Prinse en 11 Prinsesse. De kans det-se Prins of Prinses waers, is dus maar heeeeeeeeel klein. 't Leefs leet de leiding vanne Feesnaeskes jidderein mitdoon, mer det geit helaas neet en dus höbbe v'r dit jaor weer motte laote.

Alle kinger höbbe geliek maonjigaovend ein breefke in de bös gekrege mit 't sjlechte nuujts (doe bös d'r neet biej) of 't gooie nuujts (doe bös ... gewaore). Netuurlik haopt de leiding det alle kinger die neet zeen ingelaot, toch mit komme doon mit de vastelaovend! Bös dich benuujd waem de nuuje Prins en Prinses, Vors, Adjudante, Nar, Dansmarietjes en Raodslede waere? Kom dan zönjig 23 jannewari nao 't KA-Hoes. Van 14.11 toet 17.11 oere is 't fees!

Geschreven door: Hanneke op 2011-01-18 om 22:37:15


Op nao ós 2x11 jaorig jubileum

Wis dich det de Feesnaeskes in 2011 precies 2 x 11 jaor besjtaon? Ech waor! En netuurlik mot det gevierd waere. De leiding vanne Feesnaeskes is daorom al väöl eerder es normaal gesjtart mit de veurbereidinge veur 't nuuje vastelaovessezoen. De eerste datums zeen al geprik: op 23 jannewari is 't Prinsebal en op 6 fibberwari is eine sjpektaculaire jubileummiddig mit allerlei vette artieste.
Zet die datums dus alvas oppe kalender en inne agenda. Netuurlik gaon d'r in ós jubileumjaor nag väöl meer leuke dinger gebeure... Dao-euver heurt g'r gauw meer. D'r zeen trouwes al kinger die ós vraoge wanneer de insjrieving is veur de Feesnaeskes. Dao mot g'r nag efkes op wachte. Pas nao de Kersvakansie waere oppe sjool insjriefbukskes oetgedeild...

Geschreven door: Hanneke op 2010-11-05 om 17:29:43


Gezoch: foto's en filmkes
Waem kint ós helpe aan leuke foto's en filmkes vanne Vastelaovend? Hanneke haet ein deil foto's gemak, mer die zeen onbedoeld heel artistiek gewaore en op ein gegaeve moment deej 't toesjtel 't zelfs helemaol neet meer. En veer wille netuurlik waal leuke foto's op dees site! Dus mail os dien sjiekste foto's en dan zette veer ze online: feesnaeskes@live.nl
Geschreven door: Hanneke op 2010-02-21 om 15:30:40


Guus duit Biemösje-prik-je
De Biemösje hawwe get nuujts bedach: nao 't Kloonetrèkke in 't KA-hoes en inne Beuk ginge zie Biemösje trèkke. Mit ein hele grote Biemösj op ein ker ginge ze 't ganse dörp door veur ein sjpelke te doon: 'Biemösje-prik-je'. Det is net zoget wie ezeltje-prik-je mer dan mit ein Biemösj. Netuurlik mosjte Guus en Britt 't auch probere mit eine hele rare duukbril op. En Guus woor in 't KA-hoes zelfs de sjnelste! Good wôh?
Geschreven door: Hanneke op 2010-02-21 om 15:18:27


Sjiek is mich dat
Neet allein ós dansmarietsjes kinne heel good danse... ós Prinses Britt en zien adjudante Aniek kinne d'r auch get van... Op 't leedje 'Sjiek is mich dat' van Fabrizio höbbe ze zelfs eine spesjiale dans bedach. Hae is bes waal ingewikkeld, mer auch erg grappig. Waem wilt weite wie 't geit, mot mer efkes aan Britt of Aniek vraoge veur ein dansles...
Geschreven door: Hanneke op 2010-02-21 om 15:11:04


Onvermeujbare dansmarietsjes
Os dansmarietsjes Marissa, Evy, Dana en Sophie wore ech te gek! En neet kepot te kriege... Oppe Kloonetrèk höbbe zie zès (jao ech waor, zès) keer opgetraed. En oet ervaring kin ich (Hanneke) zegke det se van det denske toch waal heel erg meug waers! Applaus dus veur ós dansmarietsjes (en auch veur de res vanne Feesnaeskes, want die kinne 't denske inmiddels auch allemaol en doon altied good mit!). Oppe foto zuus-se wie veer geoefend höbbe in 't KA-hoes.
Geschreven door: Hanneke op 2010-02-21 om 12:08:02


Gezeen op de Bontje Aovend...
Nao ós optraeje oppe Bontje Aovend vanne Biemösje zeen väöl Feesnaeskes nag same mit häör awwers gebleve. Dansmarietje Marissa haet zelfs toet half ein gewach toet Big Benny kwoom. En det haet 't geweite. Benny troch 'm zo 't podium op en toen moog Marissa mitzinge. Ech waal vet! Trouwes Nar Bas kint alle leedjes van Benny auch al oet de kop, want hae haet mit 't Matinee mitgezonge. Sjiek!
Geschreven door: Hanneke op 2010-02-21 om 11:59:38


't Gastebook is online
De letste nuujtjes euver de Vastelaovend motte nag komme. Mer höb geer zelf nuujts of ein sjoon verhaol euver de Vastelaovend dan kint geer det al kwiet in ós gastebook!
Geschreven door: Marcel op 2010-02-18 om 23:15:24


Sorry, veer zeen aan't feeste, geine tied veur nuujts
Ha! Geer zalt waal dinke: nou, op die site vanne Feesnaeskes gebeurt auch nieks. Sorry. Veer höbbe 't noe efkes te drök mit feeste. Op Essejegoonsdig gaon veer alle foto's online zette en vertille wat veer höbbe mitgemak. Mer veurluipig wille veer dao nag efkes neet aan dinke. In de videotheek vink geer noe trouwes waal al ein sjiek filmke wat de pap van Britt haet gemak! Doei!!!!!!!!!!!!!
Geschreven door: Hanneke op 2010-02-15 om 11:08:11


Oefene dansmarietsjes
Ós dansmarietsjes zeen al flink aan't oefene. Morge (6 februari) laote zie veur 't allereers häöre dans zeen op ein heel leuk leedje. Geer zit netuurlik heel benuujd, mer veer verklappe lekker nieks... Lekker puh. Veer haope det jidderein good mitduit! Oppe foto zuus-se dansmarietsjes Dana en Sophie! PS:  Höb geer auch ós awt-dansmarietjes Tessa, Maud, Shirley en Inge inne Vastelaovesgezet gezeen? 
Geschreven door: Hanneke op 2010-02-05 om 16:17:54


Neet vergaete de raame te versiere!!!

Guus en Britt höbbe op sjool kleurplate en sjpelregels oetgedèld veur de raamversierwèdsjtried. Waem de kleurplaat neet haet gekrege, kint d’r ein aafhaole biej Sanna. Jidderein toet 12 jaor kint mitdoon. Doe hoofs dich neet in te sjrieve en ’t kós nieks. Dit zeen de regels:
- Versier ein of meer rame van dien hoes. Wie origineler, wie baeter!
- Zorg det diene naam en laeftied good zichbaar oppe raam aanwezig is.
- Zorg det auch de kleurplaat good zichbaar oppe raam geplek is.
Det is alles! Ein deskundige vakjury van de Feesnaeskes zal op zaoterdig 13 fibberwari vanaaf sjmorges 10.00 oere ’t ganse dörp (inklusief de Varsj, Hols en nöm mer op) rondjrieje óm de rame te beoordeile. De priesoetreiking is nao aafloup van de Kloonetrèk in de Beuk. Te winne zeen ereplaatse oppe drie Prinsewages tiedes de Posterse optóch op Vastelaovesmaonjig en kaertjes veur de Efteling. Doot allemaol mit, dan sjteit ’t dorp d’r auch weer sjoon op!

 

Geschreven door: Hanneke op 2010-02-05 om 16:12:27


Op bezeuk biej Prins Jason en Prinses Janine
Prinses Jason en Prinses Janine vanne Dorsjvlaegels hawwe zönjig 30 jannewari resepsie. De Feesnaeskes zeen dao auch haer gewaes om häör te fillicitere. En netuurlik auch alle angere Dorsjvlaegels. 't Woor hersjtikke gezellig. Veer höbbe same flink gesjpronge. Kiek auch nao de foto's in 't fotoalbum.
Geschreven door: Hanneke op 2010-02-05 om 16:02:35


Mail van awt-Prins Joey
Veer höbbe e-mail gekrege. En neet van zomer emes... Nae, van awt-Prins Joey! Hae sjrief 't volgende: 'Ich wil jidderein vanne Feesnaeskes eine sjoone Vastelaovend wunsche. Groetjes, Joey'. Nou Joey, hersjtikke bedank! En netuurlik haope veer dich mit dees daag vaak te zeen en same mit dich te sjpringe! Op de foto zuus-se Joey biej Onger Veurbehoud. Dao bleus hae noe de ganse Vastelaovend mit mit.
Geschreven door: Hanneke op 2010-02-05 om 15:57:47


Prinsefoto make
Zo'n sjiek Prinsepaar es Guus en Britt haet netuurlik auch ein sjoon Prinsefoto neudig. En dus zeen veer maonjig nao 't oetrope direk nao fotograaf Peter Schouwenberg in Hirkeboosj gewaes. Dae haet ein heleboel mooie foto's gemak. Veer höbbe eine ganse aovend d'reuver gedaon om te keze. Mer oeteindelik is 't toch gelök. 't Resultaat höb geer al kinne zeen inne vastelaovesgezet!

Geschreven door: Hanneke op 2010-02-05 om 15:25:35


’t Oetrope doer twee boeve
Wie Prins Joey en Prinses Sandra en alle angere Feesnaeskes van 2009 wore aafgetraeje, mósj netuurlik zo sjnel meugelik ’t nuje Prinsepaar waere oetgerope. Mer ja, det ging bao mis, omdet twee boeve, Japie en Bert, de Feesnaeskes-sjpulle wolle pikke. Gelökkig is det neet gelökt, doerdet Marcel en Hanneke extra beveiliging hawwe aangebrach oppe zolder van ’t KA-hoes. De boeve vele euver knikkers, trokke aan allerlei käördsjes wodoer dinger op häöre kop terechkwome en de Feesnaeskes-kas sjting auch nag onger sjtroum. De plietsie haw häör daodoer zo te pakke en de rechter goof die twee es sjtraof det zie mósjte helpe mit ’t oetrope vanne nuje Prins en Prinses.
Eers kwoom de nuje Vors, Remon (Buitenhuis), teveursjien en doe sjpronge auch gauw genog Guus en Britt oet de kas. Netuurlik waerde zie oetgebreid gefilliciteerd doer de Biemösje en de Dorsjvlaegels. En zelfs de Binneste Boete Bandj kwoom häör ein serenade bringe. Sjiek. De proklamasie die Guus en Britt höbbe veurgelaeze, vingk geer doer in ’t menu oppe knoep ‘Proklamasie 2010’ te klikke en kiek auch mer ins in ’t fotoalbum nao de eerste foto’s… (d’r kómme d’r nag meer).
Geschreven door: Hanneke op 2010-01-17 om 22:26:39


Emosjioneel aafsjied van Prins Joey en Prinses Sandra
Boehoehoe… ’t Is keileuk om ein nuuj Prinsepaar oet te rope, mer det beteikent waal det-se auch aafsjied mos numme van die ‘awwe’ Prins en Prinses. En det is bes waal sjtom. Mer gelökkig deej awt-Vors Klaas (jao, dae mósj auch aaftraeje) ’t heel good mit väöl ooooh’s en aaaaaaaaaaaah’s en bleve Joey en Sandra geweun lache! Alle Feesnaeskes van 2009, auch de Nar, Dansmarietsjes en alle èllef Raodslede, höbbe super mitgesjpronge aafgelaupe jaor. En zie krege dan auch ein heel hel applaus vanne luuj inne zaal biej ‘t aaftraeje. Veer (de leiding) haope euch netuurlik allemaol weer te zeen mit dees daag om de nuje Feesnaeskes te sjteune (en omdet veer det geweun gezellig vinge!).
Geschreven door: Hanneke op 2010-01-17 om 22:14:43


Verrassing: doe waers Prins(es)!

Vriedigaovend krege Guus en Britt ein grote verrassing. De leiding vanne Feesnaeskes sjting opins aanne deur. Britt zien auge waerde zo groot wie sjöttelkes (ze vele ech biejnao droet) en Guus dae tróch gans wit weg. Gelökkig veel Guus neet flauw en nao eine cola keke de uigskes van Britt auch allein nag meer heel bliej, want… rapapapa… zie krege ’t nuujts te heure det zie Prins en Prinses zowwe waere. Zo simpel is det nag neet heur, want dan mos-se nag ein paar daag lege taenge dien vrunj en vriendinne én d’r mot ein proklamasie waere gemak. Dao mot heel deep euver naogedach waere, mer gelökkig hawwe de paps en mams al ein bietje geholpe. En mit ein paar cola (en koffie) is ’t heel good gelök!

Oppe foto zuus-se wie de proklamasie en de sjpreuk is bedach… mit de gordiene toe, zodet nemes Guus en Britt kósj zeen.

Geschreven door: Hanneke op 2010-01-17 om 22:03:17


Nag mer ein nachje...
Ooooooooooh,.. Veer zeen hersjtikke zenuwechtig. Morge geit 't dan toch ech gebeure. Nag mer ein nachje...en dan rope veer de nuuje Prins en Prinses vanne Feesnaeskes oet. Ze höbbe d'r al ontzettend väöl zin in en höbbe eine geweldige sjpreuk bedach. Ein probleempje: d'r is nag gein toneelsjtökske. Zou 't goodkomme? Kom morge (zónjig 17 jannewari dus) kieke in 't KA vanaaf 14.11 oere.
Geschreven door: Hanneke op 2010-01-16 om 11:01:36


Zjwarte bókse en witte blouse oetverkoch in Remunj
Inne sjtad weite ze neet wat häör euverkump. Allemaol kinger oet Postert höbbe opins ein zjwarte bóks en eine witte blouse neudig. De leiding vanne Feesnaeskes haet gezeen det in eine winkel zelfs twee nuuje Feesnaeskes tegeliekertied bókse aan't passe wore. "Hiej pas mien vot neet in" en "Ich krieg de rits neet toe", det saort oetrope haet de leiding al geheurd.
En auch biej de dansmarietsjes is d'r al sjtress. "Kin ein witte legging auch?", krege veer al es vraog. "Of mot 't perse ein maillot zeen?" Veer zeen d'r dan auch van euvertuug det de Feesnaeskes van 2010 d'r sjpik en sjpan op komme te sjtaon tiedes 't Prinsebal aansjtaonde zónjig (17 jannewari) in 't KA-hoes. Det wilt geer toch zeker auch zeen. Kom kieke! PS: veer höbbe geheurd det de Prins nag néét zien maillot haet gepas...
Geschreven door: Hanneke op 2010-01-14 om 13:55:50


Recordaantal aanmeldingen voor Feesnaeskes
Iet (die altied beheer duit in 't KA-hoes) zou zegke: 'Det is toch neet meer normaal!'. Inderdaad. 't Is neet meer normaal wieväöl aanmeljinge veer höbbe gekrege veur de Feesnaeskes. Mer leefs 47 jonges en maedsjes höbbe zich opgegaeve. Viefteen jonges wolle Prins waere en derteen maedsjes Prinses.
Van de eine kantj is det netuurlik hersjtikke sjiek det zoväöl luuj zich aanmelje, want det beteikent det de kinger van Postert waal weite wat feeste is én de Feesnaeskes leuk vinge. Mer van de angere kantj is 't auch sjtom, want veer höbbe mer plaats veur 21 kinger (eine Prins, ein Prinses, eine Vors, eine Nar, vaer Dansmarietsjes, twee Adjudante en ellef Raodslede). Noe motte veer dus 26 jonges en maedsjes teleursjtelle en det is helemaol neet leuk.
Vanmiddig (dinsdig 12 jannewari) höbbe alle kinger die helaas neet zeen ingelaot ein breefke inne bös gekrege. Es leiding haope veer heel erg det al die jonges en maedsjes neet te erg verdrietig zeen en det veer ze allemaol teruukzeen op ós Prinsebal. En netuurlik mit de Vastelaovend zellef!

De 21 kinger die in 2010 waal biej de Feesnaeskes komme, waere vanaovend of morge-aovend opgebeld.
Geschreven door: Hanneke op 2010-01-12 om 14:39:07


't Prinsebal kump d'r aan!
Zónjig (17 jannewari) geit ’t gebeure! Dan waere in ’t KA-hoes de nuuje Prins en Prinses vanne Feesnaeskes oetgerope en netuurlik auch de Vors, Nar, Raod van 11, Adjudante en Dansmarietsjes… Bös-se auch zo benuujd?
Doe moogs verkleid nao ’t Prinsebal kómme en danse en SJPRINGE, SJPRINGE, SJPRINGE... op vastelaovesmeziek. ´t hoogtepuntj is netuurlik ’t oetrope van ’t nuuje Prinsepaar, mer d´r is de ganse middig fees, mit weer ein toneelsjtökske vanne leiding vanne Feesnaeskes.
Veer beginne óm 14.11 oere mit ’t aafsjied van Prins Joey en Prinses Sandra (aaaaaaah). Det is netuurlijk neet leuk, mer zie höbbe ós al belaof daonao nag mit ós mit te feeste toet ein oer of ellef op vief. 't Prinsebal is trouwes helemaol gratis.
Dus: bös doe benuujd waem de nuuje Prins en Prinses waere dit jaor? En wat veur ein (te?) gek toneelsjtökske de leiding noe weer haet bedach? Kom dan nao 't Prinsebal vanne Feesnaeskes op zónjig 17 jannewari in ’t KA-hoes!
Geschreven door: Hanneke op 2010-01-11 om 16:44:43