't Idee om ein kingercarnavalsvereiniging op te richte is ontsjtange doerdet Nicole Jöris en Jacqueline Aelen van KingerVakantieWerk rondj 1989 get mier wolle organiseere es allein kers- en zomeractiviteite. In det jaor zeen dao ein herfstactiviteit, Sint Mèrte en Vastelaovend biej gekomme.

Veur de vastelaovend van 1990 waerde ein insjriefformulier veur Prins, Prinses en raod gemak en de kinger van de legere sjool mochte eine naam verzinne veur dees nuuj vastelaovesvereiniging. ‘t Ierste jaor goove zich mèr ach kinger op en zo hawwe vier eine prins, prinses en eine raod van zes. De naam Feesnaeskes is bedach door Ilona Goldsmits. ’t Prinse- en Prinsessepak wool Marlies Aelen waal maake. De Raod kreeg twiddehands keepkes en sjteekskes en de Prinsewage kreege vier van de Dorsjvlaegels. In det jaor waas d’r eine kingerbontjemiddig en eine carnavalsmiddig same mit de Dorsjvlaegels.

Mede dankzij Sjtichting Jeug en Jongere, de Dorsjvlaegels en de Biemösje nomme de Feesnaeskes sjteeds mier vorm aan en begoosj de vastelaovend biej de kinger van Postert te laeve. Noe waert d’r jidder jaor ’t Prins Oetrope gehawte en de Buujelemiddig (veurhaer Kloonetrèk, toet 2010) op vastelaoveszonjig. Auch zeen de Feesnaeskes d’r biej mit de resepsies vanne Dorsjvlaegels en Biemösje en netuurlik mit die daag zellef. De animo onger de kinger is zo toegenomme det de Feesnaeskes sins 2003 neet allein Prins, Prinses, raod en nar höbbe, mèr auch eine vors, adjudante en dansmarietjes.

Binne ’t lijdorsteam is ’t sjtekske ein paar keer doorgegaeve. Zo noom Jack Schmits nao ein deil jaor 't werk van Nicole euver. En droog Jack zien take nao teen jaor weer euver aan Dennis Janssen, Bas Mulders en Marcel Schmitz. In 2010, wie 't jubileumbook vanne Feesnaeskes oetkwoom, wore die letste twee same mit Hanneke Drohm, Susan Schmitz-Ramakers, Judith Peters en Job Derix de begelijdors van de groep. In 't sezoen 2011/2012 versjterkte Tessa Reinders 't lijdorsteam wo ein plaetske vriejkwoom omdet Susan woor gesjtop. In 2013/2014 is Celine Goossens d'r biej gekomme en in 2014/2015 Iris Meijers, die twee höbbe Job opgevolg. 
Mit hulp van allerlei luuj, num beveurbeeld de waageboewers, zorge zie d’rveur det ‘t wèrk waert veurt gezat.

Om nag leukere activiteite te kinne organisere zeen de Feesnaeskes in 1999 gesjtart mit ein financiele aksie: ze ginge om nonne-votte te verkaupe inne optoch. Veural de ierste jaore woor det ein groot succes, want biej kefee De Klomp ware alle 750 nonnevotte al verkoch. Nao beheurlik get plèkvingers van al dae sòkker woor de leiding de vötjes waal meug. Ze lete zich in 2003 invalle det ’t waal sjoon zou zeen om ein eige leedje te höbbe. In det jaor is ‘In Postert is get oet’ (baeter bekint as ‘Sjpringe’) oetgebrach. Meer as 250 cd’s waere verkoch en ’t woor dé kraker! In 2007 kwoom ein nuuj hit: ‘Neet Sjpringe’. Det leedje haet neet gewirk, want de kinger van de Feesnaeskes sjpringe nag ummer. In 2011 volgde 't 'FeesPoloNaeske'.